Ndi mwene Siyani!
Izina rintarura nayobye,
Iyo nzimiye mu nzira z’isi,
Iyo nabuze aho nerekeza,
Iyo abantu banyibajije bati:
“Uri muntu ki? Ukomoka he?”
Nti ndi uwo kwibagirana,
Nti ndi uwo kwihakanwa,
Nti ndi izina ryazimiye mu mateka,
Ndi mwene Siyani,
Mfite inkomoko, mfite amateka,
Mfite abo navukanye,
Mfite abambanjirije mu rugendo rw’ubuzima.
Iyo nzimiye, ndahamagara,
Iyo nayobye, ndibaza,
Iyo abantu banyobewe,
Abarezi bati: “Witwande?”
Nti: “Ndi mwene Siyani!”
Bati: “Ko tutakumenye, uri nde?”
Nti: “Ndi mwene Siyani wa Théodore,
Umwana w’uwari umurezi,
Umwarimu wa mbere mu rugendo rwanjye,
Uwanyigishije kumenya aho ntangirira,
Uwampaye izina ryo kwitwaza mu buzima.”
Bati: “Siyani turamuzi!
Iwabo ni mu Ruhengeri,
Mu mateka y’iwabo w’Abarema,
Siyani wa Théodore turamuzi!
Turamuzi i Kayange,
Turamuzi mu bantu,
Turamuzi mu mateka!”
Oooh! Mbega ukuntu izina rivuga!
Mbega ukuntu inkomoko itazimira!
Iyo izina ryanjye ritangiye kuvugwa,
Amateka agatangira gusubira inyuma,
Abo tutabonanye bakanyibuka,
Abo ntigeze menya bakamenya aho mva.
Kiragomagiye, kirashinjagiye,
Kiradomagiye, iyeheeee!
Ni amagambo asigara mu matwi,
Ni ururimi rw’iwacu rutazibagirana,
Ni ibisigo by’ubuzima,
Ni ibimenyetso by’umuco,
Ni ijwi ry’abadusigiye amateka.
Ndi mwene Siyani!
Sinshaka kwibagirwa aho navuye,
Kuko utazi aho yavuye,
Ashobora no kutamenya aho agana.
Nubwo inzira zaba nyinshi,
Nubwo imisozi yaba miremire,
Nubwo isi yampindurira amayira,
Nubwo imyaka yansiga inyuma,
Izina ryanjye rizakomeza kunsanga.
Ndi mwene Siyani!
Ndi umwana w’amateka,
Ndi igisubizo cy’urugendo rw’abambanjirije,
Ndi igice cy’umuryango,
Ndi urwibutso rw’abatubanjirije,
Kandi nzaba inkomoko y’abazankurikira.
Iyo nzimiye, izina riranzi,
Iyo nayobye, inkomoko irantora,
Iyo abantu banyobewe, amateka aravuga,
Iyo nibajije uwo ndi we,
Nsubiza umutima wanjye nti:
Ndi mwene Siyani!
Izina rintarura nayobye,
Inkomoko yanjye ni igicumbi cyanjye,
Amateka yanjye ni umurage wanjye,
Kandi aho nzajya hose,
Nzajyana izina ryanjye!
“Siyani wa Théodore, Théodore wa Paulin, Paulin wa Bizeyi… Waragiye, ariko ntiwibagiwe; nubwo utagihari, uracyadutarura mu mizi y’inkomoko, mu mateka y’umuryango no mu rukundo wasize mu mitima yacu. Abantu baragenda, ariko umurage wabo ntugenda!”
— Dr. Havugimana Alexis
